Skiljiði skuldirnar eftir og hefjið nýtt líf erlendis

     Framtíðin er björt eða hitt þó heldur þegar litið er til þeirra lausna sem skuldsettu fólki eru boðnar á þessum síðustu og verstu tímum. Ég var að leika mér að hugmyndum og lauslegri skoðun á hver raunveruleg staða fjölskyldu er sem keypt hefur íbúð á síðustu árum. Ég gaf mér að kaupverð nam 20 mill. og að fjölskyldan væri gift par með 2 börn og að húseignin hafi  verið keypt fyrir ári. Ég hef reynt að gera mér grein fyrir væntanlegri raunþróun á annarsvegar verðmætastöðu fasteignar og hinsvegar skuldastöðu fjölskyldunnar eftir ca: 7 ár. Dæmið er í grófum dráttum og hjónin starfa í almennum störfum með miðlungstekjur.

     Það er hrollvekjandi pæling að ganga í gegn um og hugsa til hvernig fjármagnssamfélagið leikur þessa fjölskyldu nú og kemur til með að gera næstu ár. Hér er verðtryggingin að verki en hún, eins og allir vita, verndar einhliða fjármagn gegn rýrnun á meðan verðmæti launa og sparifjár nýtur engra slíkra fríðinda og varla lengur hægt að ganga að fullyrðingum ráðamanna um ríkisábyrgð gefnum.

     Eftir eitt ár frá kaupum hefur höfuðstóll lána, þ.e.a.s. upphafslánin, hjá þessari fjölskyldu hækkað um ca 2 mill. þrátt fyrir skilmerkar greiðslur á gjalddögum afborgana. Kaupgeta launanna hefur lækkað um ca 20% á árinu sem gerir raunáhrif skulda á launastuðul að skuldir ættu að reiknast á núverandi kaupmætti sem myndi þýða að lánin stæðu nú í 26.5 mill.

    Nú er samdráttur í fasteignamarkaði og má gefa sér að lækkun fasteignaverðs hafi orðið ca: 10% á ibúðarverði sem komið er þannig að söluverðmæti fasteignarinnar ætti að vera ca: 18 mill. Þarna er nú þegar rúmlega 8 mil. mismunun á verðmæti þeirra peninga sem fengnir voru að láni og þeim verðmætum sem keypt voru fyrir lánað fé. Það er gert ráð fyrir miklum samdrætti þetta árið og næsta sömuleiðis sem gefur ástæðu til að ætla að þróun fasteignaverðs og lána haldi í gagnstæðar áttir. Ef við gefum okkur svipaðar tölur fyrir þessa þróun næstu tvö ár má ætla að skuld hjónanna verði komin upp í ca: 35 mill. að loknu ári 2010 en verðmæti fasteignarinnar sé um 15 mill.

     Það eru margir sem telja að það muni taka okkur um 7 ár að vinna okkur nokkurn veginn út úr þeim vandræðum sem við nú erum í og ef litið er á fjölskylduna margnefndu þá eru líkurnar á að hún geti staðist lágmarkskröfur fjölskyldulífsins ásamt greiðslukröfum samfélagsins hverfandi. Við erum sem sagt að horfa á lítin hóp fólks sem á í vændum sundrung, félagsleg-, fjármálaleg- og uppeldisleg vandamál og þau hafa ekki hugmynd um það sjálf kanski, hver veit. íbúðin hefur kanski hækkað upp í 25 mill. að verðmæti á þessum árum en skuldirnar eru 3x sú upphæð eða 75 mill. og íbúðin óseljanleg næstu 15 árin og börnin kanski orðin 3. Í gaggó og 3 ár síðan síðast voru keyptir skór á alla fætur í húsinu að ekki tala um fatnað eða aðrar "aukaþarfir" heimilisins.

     Hér er ætlun samfélagsins um rígbindingu þegnanna fullkomnuð. Hjónin geta sig hvergi hreyft og neyðast til að þræla myrkranna á milli alla æfina bara til að greiða af verðandi hreysi sem þegar upp er staðið hefur ekki séð málningu á veggina í 30 ár.

     Það má vel vera að þetta sjónarspil sé einhverjum til þægðar en ég mæli eindregið með að þeir sem finna sig í þessari stöðu að þeir hinir sömu athugi gaumgæfilega að skilja skuldirnar eftir og flytji sig úr landi. Að þegnum sé boðið upp á framtíðarhorfur sem að öllum líkindum munu renna í þennan farveg er ekki á ábyrgð þeirra skuldsettu heldur samfélagsins og ef hjón með börn vilja eiga möguleika á að gefa sér og börnum sínum mannsæmandi líf og uppeldi er ekki um annað að velja en leita framtíðar í öðru landi.

     Erlendis m.a. á norðurlöndunum er hugtakið "að eiga" ekki eins ríkt í samfélagskröfum fólks og hérlendis. Þú getur í öryggi leigt sömu íbúðina alla ævi. Þú starfar 8 tíma vinnudag eða jafnvel skemur. Þú lifir við stöðugan virðishag með nokkuð jafna kaupgetu og í kring um þig er samfélagstryggingarkerfi sem sér þér fyrir þörfum og þjónustu. Skólaganga barnanna er tryggð að öllu leiti og fellur inn í samfélagstrygginguna. Það er því ærin ástæða til að huga gaumgæfilega að samanburði þeim sem okkur býðst hérlendis nú og hvað bæti beðið manns erlendis. Váboðar þeir sem prédika að skuldir muni elta mann út virðast gleyma að þar getur þú orðið skuldlaus á fimm árum gagnvart því erlenda samfélagi og að erlendir (íslenskir) skuldunautar geti neyðast til að samþykkja uppgjör. Slíkt uppgjör mun samt ekki ganga eins nánda nærri einkafjárhag heimilisins eins og sú barátta sem hérlendis er boðið upp á í nánustu framtíð. Þar eru þarfir heimilisins í fyrirrúmmi fyrir skuldastöðu og það eru fjármagns- eða launaafgangar sem látnir eru greiða skuldir. Það er meira að segja hægt að eiga bíl á meðan á skuldagreiðslum stendur.

Athugasemdir

[viddi, 4.1.2009 kl. 20:25]

Ja algjörlega sammála þér i þessu.

það verður ekkert líf hérna í þessu landi..